9/2/2009
اليوم بالنسبة لي يوم مهم مو عشان شي
بس لانه عيد ميلاد اخوي البوتش حالياً فهوود
(ولدي تجاوزاً)
"أدري بتقولون احنا شكو بس اتمنى انكم تصبرون"
اليوم فهوود يكمل 20 سنة
لكم طولت العمر
"السالفة تييكم.."
فهود اللي اليوم كمل 20سنة
ويدرس بكلية الهندسة
مو عاجبة حال الكويت
بكل بساطة يقول الكويت :
ما فيها خير
وخيرنا مو لنا
و الكويت راحت
"تدرون"
أنا يوم كنت في الجامعة كنت أقول نفس الحجي
مو بس جذي قررت اهاجر بس اخلص
الجامعة
"لا تسؤلوني ليش "
بس أبي أيمع جم بيزة
و أسافر
كنت مقرر أروح فرنسا
و أعيش فيها لو هوم ليس
اشتغل أي شي
"بس اليوم يوم قالي فهوود"
ما ادري اصار
" انفعلت "
" قمت أقول شي ما كنت اقوله من قبل"
قمت اصارخ من قمت راسي
هذي الكويت مالتنا
مو ما لتهم
هذي اللي
صارت واستوت
وهي أرض ما فيها ماي
"عارفين أرض ما فيها ماي يقررون ناس يسكنون فيها يعني شنو"
"تبون الصج أنا ما أدري"
" و الصج بعد ان اكيد فيها سحر خاص فيها "
" ترى .."
السياسي له ديرة ثانية
و أقلها عن طريق اللجوء السياسي
و اللي عنده فلوس
فلوسه ديرته
فهذيلة يقدرون يستغنون عن هالديرة
"بس انت لا.."
"وهذيلة اللي يقدرون يستغنون عن هالديرة
اهم اللي يلعبون بالديرة وهم
يشرعون لها القوانين"
مو مهم بعد
اللي بقوله وهذا المهم هذيلة رايحين و انت اللي باقي
ويدانا يوم ما كان في ماي
بالكويت اسكنوها
و اليوم عقب كل اللي وصلناله
يبونا انخليها..
؟!!!
انا بالنسبة لي
ما أخليها
فهمت فهوود
؟!!
ملاحظة: بما ان هذا اليوم مهم لهذه الدرجة فسوف يكون هو اليوم الرسمي لافتتاح هذا الـblog
بركة
لكل قاعدة شواذ
ردحذفهناك اناس مستعدين يخسرون كل شيء من دون مبالاة
ولكن الكويت هي القاعده الشاذه اللي "مستحيل افكر " اني اخسرها لو اجبروني على البعد عنها .. سيظل فكري معلق فيها واذا توفاني الله .. ستكون روحي معلقه فيها وفي اعماق ترابها .
على الرغم من اختلاف التيارات السياسية تظل الكويت فوق الكل .. فوق كل اعتبار .. فوق كل تيار .. فوق كل شخص شاء ام ابى .....
الكويت حلوه بحلوها ومرها .. بزينها وبشينها
صحيح انه هناك ناس دخلاء على البلد يريدون سلب ديمقراطتنا وحريتنها وهم يريدون التحكم بنا حسب افكارهم ولكن سنكون لهم بالمرصاد الى ان يندحروا وتشرق شمس الكويت من جديد
اشتدي يا ازمة ان الفرج لقريب
الكويت تنادينا .. سنقف صفا واحدا
من اجل قلعتنا الصغيره المحصنه.
تدري شنو الخطير جداً ان واحد عمرة ٢٠ سنة
ردحذفيفكر ان ديرته" ما فيها خير"
و الخطر الأكبر ان يكون مهندس
شلون نقدر نبني اي شي
اذا مهندنيسنا المستقبليين
يفكرون جذي
؟!!!
درجة الوعي لدى الشباب والبنات زادت
ردحذفعلى الرغم من صغر سنهم نسبيا
وهذا ينعكس ايجابا
انا اعلم ان هؤلاء الشباب لن يسكتوا بعد الآن
عن اي خطأ او اي ممارسة تمس الوحدة الوطنية
وهم الاصلاح القادم
وانا متفائل فيهم
السلام عليكم يا جماعه
ردحذفانتم اتكلمون عن الشباب طبعاً الكويت فوق الكل واحنا كلنا مالنه غير الكويت وانحب الكويت باللي فيها والحمدالله ماكو إلا الخير بس في شغلات عندنا غلط وانتمنى اتصلح مو من المجلس ولا الحكومه لا من الشعب نفسه صدقوني لو كل واحد يحمد ربه باللي عنده صدقوني ما تصير عندنه هالسوالف ولا هالمشاحنات الصايره والمصالح المنتشره وسياسة يا تمشيني يا شوف بالمجلس شبيصير فيك اللي بقوووله انه احنا القوانين موجوده عندنا بس تفعيل القوانين مو موجود وانتمنى انه كل شي نمشي عليه بقانون ويكون على الكبير والصغير .....
الـــــــــكــــويــت تـبـي الـهـمـه
طبعاً معاكم اخوكم ابو الــ20 سنه
شكراً
ردحذفلكم
على الأمل
و التفاؤل
و الحيرة
(:
الكويت تاج الخليج و عروس الكويتين كلهم
ردحذفالكويت انجبت ابناءها و لم تتركهم هكذا من واجب كل كويتي يدافع عن ارضه و يحميها مو بس بالسلاح اوقات الكلام يكون كالسيف صارم يدخل في الدم و يخرج منها كالرصاصة الكلام لا يعجز عن شكري يا كويت فمنها بدأنا و منها نسير علي ترابج نمشي و نحمد اللة ان احنا من ريحتج ولا غبنا من الدنيا يكفي اسمي يكون فوق ارضج الكويت اثمرت شبابها ولاقت حصادها فيكم و انتوا بيدكم تقدرون ترفعون اسمها عالي نبقي ابناء ديرة وحدة و هذي الكويت صل علي النبي